Stejišćo a zestawa sudnistwa

Wustawowe sudnistwo je dźěl prawodawskeje mocy, jeho sudnicy su njewotwisni a jeničce zakonjej podrjadowani. Zdobom pak je wone tež organ wustawy, kotryž steji runoprawnje pódla krajneho sejma a statneho knježerstwa. Wuraz tuteje runoprawosće je mjez druhim, zo su jeho rozsudy zawjazowace za wšitke dalše wustawowe organy, zarjady a sudnistwa a zo nabudu we wěstych padach zakonsku móc.

Wustawowemu sudnistwu přisłuša dźewjeć sudnikow a samsna ličba zastupjerjow. Pjećo z wustawowych sudnikow, mjez nimi prezident a wiceprezident, dyrbja być powołanscy sudnicy. K zawěsćenju njewotwisnosće Wustawoweho sudnistwa wola so sudnicy wot krajneho sejma na namjet statneho knježerstwa resp. prezidija krajneho sejma z wjetšinu dweju třećinow jeho čłonow na dźewjeć lět a móža so jenož po předpisach, płaćiwych za sudnikow w krajnej słužbje, ze zastojnstwa wuwjazać. Zastojnstwo wustawoweho sudnika njehodźi so zjednoćić z přisłušnosću k někajkejžkuli zakonje dawacej korporaciji abo ke knježerstwu zwjazka, kraja abo Europskeje unije, k Zwjazkowemu wustawowemu sudnistwu abo Europskemu sudnistwu.